السلام عليكم ورحمة الله تعالى وبركاته
اليوم بغيت نقدم ليك هد الحوت بخيزو معروف عندنا في مدينتنا انا عملت حوت سيغاغ وانتما كل وحدة تعمل اللي تحب المهم يكون كبير ومهبر ولحمو ابيض

 
المقادير والطريقة بالصور
نحتاجو اول حاجة للحوت كل وحدة على قد قياسها منقي ومغسول مزيان
شرمولة الحوت فيها: القزبر والمعدنوس مدقوقين مع الثومة وش الملح نزيدو عليهم العطرية واللي هي الكامون الملح شوية ابزار+ كاس الزيت مخلط بلدية ورومية ناخدو منو غير اللي يجمع الشرمولة والباقي نخليوه حتى الاخير+ عصير الحامض مروزية الحوت التحميرة + الخرقوم البلدي + السوادانية الحارة +لب الحامض مصير نخلطو كل هد المكونات نتاع الشرمولة ونشرملو فيها الحوت نتاعنا
ناخدو طنجرة نوضوعو فيها الجزر مقطع على الطول هو الاول + البطاطا دوائر على حساب الوليدات اللي متبغيهاش تكتفي غير بالجزر بوحدو طماطم دوائر ممكن تزيدو الفلفلة حلوة على الطول ونزلو فوق منهم الحوت اللي ششرملنا + الزيتون احمر وقشرة الحامض اللي زولنا منها اللب من بعد ناخد هداك الزيت اللي بقات علينا ونزيدو فيها ش التحمييرة من غير اللي استعملنا في المشرمولة ونخلطهم مزيان ونزلهم فوق الحوت + كاس الما ونشعل عليه البوطة ونخليه يطيب ولكن بلا منغلقو كامل بالغلاقة نتاع الطنجرة يعني نطيبو الحوت واحنا معريينها غير شوية باش الحوت يطيب قاصح ويجي مجمر مزيان وبالصحة والراحة
ملاحظة:::::::::: الحوت فاش كنطيبو مني نبغي نزلو في الطبسيل مكنحطش عليه الخضر او المرق غادي يفزاك الحوت وميبقاش قاصح داكشي علاش في الصورة النهائية انا منزلة الخضر غير في الجناب


إرسال تعليق

 
Top