السلام عليكم ورحمة الله تعالى وبركاته
اليوم بغيت نشارككم هدا الطبق السهل والبسيط انا ديما مع السهل والبسيط هههههههههههههه ولكن بنينة بشهادة كل من خدا مقاديرها وجربها ولكن هد المرة نزلتها بالصور والمراحل

يلاه على بركة الله
حاجتنا في
الشعرية السفة انا عملت كيلو لاروب هنا كنعمل ليها شوية الملاح والزيت وندهنها مزيان ونعملها تفورانا كنفورها 3 مرات وكل مرة نرشها بالماء طايب 
في كوكوط كنعمل 2 بصلات مشلدين+ الدجاج حسب الحاجة مرة نعمل العنيقات مرة نعمل قشيوشات الدجاج مرة نعمل الحمام وكل مرة ورزقو
3 مطيشات محكوكات+ م ك مطيشة الحك
الربيع مقطع
+السمن+ البزار+ الخرقوم بلدي مطحون+الملح+سكين جبير+الزيت وكنخلط هد المكونات ونزيد الماء الليغطيب لينا الدجاج ونسد عليه بلا منشحرو او نقليوهم وغتشوفو بهد الطريقة يجي الدجاج محمر زوين
من بعد ميطيب الدجاج كنزول الدجاج ومعاه شوية من لاصوص نتاع البصلة باش نخضر الدجاج من الفوق ونمرق غير القياس لان الشعرية راها مفورة3 المرات غير يغلى المرق ونرمي فيه الشعرية جهد 5 دقائق ونطفي البوطة ونقدمها مزينة بالدجاج وهديك لاصوص اللي خلينا 
وبالصحة والراحة البنات
نتمنى تعجبكم
على فكرة هد الطريقة كنعملها للسان الطير الشعرية العادية النجيمات يعني كلهم نفورهم 3 المرات وهكا كيبقاو الحبات مفارزين وخا تشيط الغد ليه مني تبغي تسخنيها متلاقاوش الحباب تلاصقو او عجنو


إرسال تعليق

 
Top